വിജയ്‌ക്കെതിരെ വിവാഹ മോചന ഹർജി

തമിഴ് നടനും തമിഴക വെട്രിക് കഴകം (ടിവികെ) സ്ഥാപകനുമായ വിജയ്‌ക്കെതിരെ ഭാര്യ സംഗീത സ്വർണലിംഗം ചെന്നൈ ചെങ്കൽപ്പേട്ട് കുടുംബ കോടതിയിൽ വിവാഹമോചന ഹർജി നൽകിയതായി റിപ്പോർട്ട്. 2026 ഏപ്രിൽ 20ന് ഇരുവരും കോടതിയിൽ ഹാജരാകണമെന്ന് നിർദ്ദേശിച്ചിട്ടുണ്ട്.
സിനിമാ മേഖലയിലെ പ്രമുഖ നടിയുമായി വിജയ് വിവാഹേതര ബന്ധം പുലർത്തിയെന്നും വിശ്വാസഹത്യ നടന്നുവെന്നുമാണ് ഹർജിയിലെ ആരോപണം. ഈ ബന്ധത്തെ തുടർന്ന് തനിക്ക് മാനസിക ബുദ്ധിമുട്ടുകൾ ഉണ്ടായതായും കുടുംബത്തിനും മക്കൾക്കും മാനക്കേട് സംഭവിച്ചതായും സംഗീത വ്യക്തമാക്കിയതായി പറയുന്നു. 2021 മുതൽ ഇരുവരും വേർപിരിഞ്ഞ് താമസിക്കുകയാണെന്നും റിപ്പോർട്ടുകൾ സൂചിപ്പിക്കുന്നു.
1954ലെ സ്പെഷൽ മാര്യേജ് ആക്ട് പ്രകാരമായിരുന്നു വിവാഹം. 1998ൽ യുകെയിൽ വച്ച് നടന്ന ഈ വിവാഹത്തിൽ ജേസൺ, ദിവ്യ എന്നിവർ മക്കളാണ്. വിഷയത്തിൽ വിജയ് ഔദ്യോഗികമായി പ്രതികരിച്ചിട്ടില്ല; ആരോപണങ്ങൾ രാഷ്ട്രീയ ലക്ഷ്യത്തോടെ ഉയർത്തിയതാണെന്ന വാദവും ഉയരുന്നുണ്ട്.